香港新浪網 MySinaBlog
« 上一篇 | 下一篇 »
歐十十 | 23rd Oct 2006 | 電影分享 | (1472 Reads)

燦爛人生

最近不約而同看了兩齣電影,一齣很好,另一齣很爛。

很好那齣叫《燦爛人生》,超爛的是港產片《情意拳拳》。 

香港電影若還是如此水準,仲點支持得住? 

我不是影評家,太深、太高的層次、電影背後的理念不懂說,亦不會分析﹙其實恐怕導演本身都無咁諗﹚,想聽高人指點,提議看《電影雙週刊》或《亞洲週刊》內的影評。

我只會憑個人感覺批評好唔好睇。

《燦爛人生》(The Best Of Youth﹚去年已有興趣看,加上好友小煙大讚;但自從《功夫》後已沒買票入場﹙再對上買票入場是《無間道》,可見我多麼支持港產片。emoticon﹚,一直等租碟,點知唔係度度有得租;買成set DVD要兩舊水,又唔捨得。

最恐怖是連BT都無,似乎真係無乜人欣賞呢套戲。

最近《燦》於影藝重上,適逢今次有飛,就一於捧場。

全長3小時片長的Part One,其間我都打了不下十次呵欠,但唔係唔好睇喎。不停放蚊,只因呢齣戲唔係荷里活巨片,畫面、對白、音效唔會有驚喜或震撼,雖未至於節奏超慢,但的確需要耐性去睇。

不過睇睇下就唔會覺得悶,同埋開始投入到裡面既世界。

其實《燦》好簡單,只係講兩兄弟既成長,從佢地既生活,透視出當時羅馬既歷史同發生過既大事。好似大陸片《茶館》咁,從一個地方經歷多個時代,體驗歷史同文化衝擊。簡單講,即係《家春秋》創作模式。

對鬼佬歷史我完全唔熟,所以片中出現既甚麼大水災,係一d感覺都無。不過o係細繳既描述下,兩位主角既性格亦漸漸感染到觀眾,睇佢地做戲同發生o係佢地身上既經歷已經好正。

印象最深刻,除左其中一位貌似羅拔迪尼路既主角﹙扮演大哥﹚,就係另一位女主角,飾演精神病人佐娜既法國女演員,佢戲份其實好少,但做得真係好入型入格,對白唔多但出晒位。當佢出場無耐就俾人帶走,就好同情佢既遭遇,到就完果時見佢再出場,先至放下心頭大石。

能勾住觀眾個心,帶領觀眾走,呢d咪係成功囉!

睇完第一part,我會等第二part,但聽聞影藝就黎玩完,都唔知有無機會上。

情意拳拳

跟住隔左一個星期,又有免費飛,今次呢齣係《情意拳拳》。

從宣傳片看,完全是B級片格局,去睇除左唔想浪費戲票之外,最大期望都係睇黃子華演出。

睇完之後,只有三個字:o徒時間!

我又唔想叫佢做「垃圾」,但真係覺得成套戲,連電視劇都不如。本來個題材係有得做,但一定要誇張或一係要好專業去處理﹙好似日本漫畫《棋魂》講捉圍棋咁,無包裝、唔神化,係無得做。﹚;但《情》中既猜枚方式,係毫不特別,咁問題就黎喇:我蒲開酒吧,唔覺得新鮮;我都唔去wet的話,又唔知你做乜,本身猜枚已經係少眾題材,咁搞咪盞更小眾?

之後到故事,又係不合邏輯:一個補習天后因為男友被猜枚女皇奪去,唔做Miss去學猜枚,點知俾佢發現原來自己真係好鍾意猜枚。本來流程無問題,但可能交代唔深,應釆兒既Miss角色出場就唔覺佢斯斯文文,所以佢後黎去酒吧做亦唔覺有乜大分別。跟住話佢愛上猜枚又係無乜點交代,只係見佢無啦啦發夢大叫「我真係好鍾意猜枚呀」,講出黎既戲就唔係好戲啦!

再者,好難相信一個受過高等教育既人,會因一時之氣同失戀打擊,而「棄學從吧」;誤入歧途、等$用被迫下海或做援交就聽過,為左要佢跟黃子華猜枚而咁樣安排故事,感覺係好唔make sense的。

至於人物性格,亦係非常表面同浮誇;連女主角應釆兒既性格都唔好討好,你唔會有其他期待。

至於黃子華既演出,只係不過不失,叫做收得片酬盡左責任囉!諗番起黎,《棟篤神探》好好多,起碼佢襯蔡少芬飾演既李維維,的確好有Odd Couple Feel。

最敗筆既,係連Gag都抄人:多條廣告片中,其中一條講應釆兒大巴大巴升落女奸角塊面度,子華大叫:「好殘忍呀……咁就繼續啦!」,算係戲中一個出色既笑位。

但一諗,咪即係《少林足球》臨尾果場球賽,謝賢幸災樂禍既Gag,簡直一模一樣!

再有呢類戲,就算真係免費,下次都要諗諗。VCD?唔好啦,環保吧!不如等「有線電影1台」播,一個月後,應該有。


[1]

有記出品…聽個名就算有興趣…在他們幾十浪接幾十浪的攻擊下都會變咗無興趣…
就算係電影台再相逢我諗我都會轉台…


[引用] | 作者 domotoiceko | 23rd Oct 2006 | [舉報垃圾留言]

[2]

對,套戲係唔得,瘋狂出promo只會令人煩厭啊!


[引用] | 作者 歐十十 | 23rd Oct 2006 | [舉報垃圾留言]

[3]

黃子華的楝篤笑,小弟覺得比後來的任何一個都要好,要花錢看,絕對值得。他的戲,便一定要在免費的情況下才看,《一蚊雞保鏢》如是,電視劇《楝篤神探》如是。正如十十兄所言,猜枚是小眾玩意,要登大雅之堂必須要神化或誇張,如平鋪直敍,倒不如走到酒吧看看還更精采。


[引用] | 作者 鄒小糖 | 24th Oct 2006 | [舉報垃圾留言]

[4]

上天很公平,你有一項過人專長已經難得,要做到十把刀張張利,其實難乎其難。


[引用] | 作者 歐十十 | 24th Oct 2006 | [舉報垃圾留言]

[5]

有線拍既戲都麻麻地,之前個套[犀照]都好一般,鏡頭拍攝只是電視劇水平,個劇本我寫都好過佢.


[引用] | 作者 米奇 | 1st Nov 2006 | [舉報垃圾留言]

[6]

我想唯有寄望《墨攻》吧,不過說也奇怪,張之亮擅長這類型的電影嗎?可沒印象。


[引用] | 作者 歐十十 | 1st Nov 2006 | [舉報垃圾留言]

[7]

黃子華同梅艷芳有套戲都叫OK小品﹐係咪叫做男歌女唱﹖


[引用] | 作者 DK | 10th May 2007 | [舉報垃圾留言]

[8]

DK,對啊,哈哈,我沒認真看過,不敢評論。


[引用] | 作者 歐十十 | 10th May 2007 | [舉報垃圾留言]