意思不是阿蘇，蘇施黃教觀眾「炒冷飯」，而是她把之前於有線《一粒鐘真人蘇》介紹過的內容，改少少包裝，照辦煮碗於《蘇GOOD》內再播一次！

我明，出色的食肆不多，可能來來去去都是那幾間，咁咪唔好介紹囉！或用其他角度去講唔得嗎？

點解要一連四集，所謂一日走勻全港，最後出來的舖頭，都是熟口熟面那幾間？

如果妳話係擺明老友做鱔稿，那我還順氣呢！

看了上星期一連四集的《蘇GOOD》之「香港美食之旅」，介紹的食肆如附圖所示，當中很多間曾在《真人蘇》內作介紹，包括呂仔記、九龍城街市紅豆冰、堂記腸粉、永合隆……連最沒賣點的凱施餅店也重覆介紹！

這只說明了兩件事：(1)主持，即阿蘇本人對這些食肆情有獨鐘；(2)阿蘇從來沒有試過其他同類型的新食肆！當然你會話糖百府都是新的啊，但我就打死都唔信，堂記腸粉真的天下無雙嗎？至少我吃不出大埔的「陳漢記」跟她有多大分別，但人家不用等位等腸粉等幾個鐘嘛！

而用的那個包裝手法也實在低級趣味得可以，帶一個阿水四圍食，然後由一班唔知乜水去猜食足一天吃了幾錢；最後估得最接近者，就來一個可有可無的無聊頒獎！既是如此，何不乾脆就咁介紹算呢？實在多此一舉！

蔡瀾偏愛「鏞記」，但至少不會次次只講燒鵝，都會叫大廚整幾味失傳菜，叫做幫手宣傳之餘，都叫有D新意。

現在的飲食節目，尤其TVB的，都已了無新意。剛做完的《咁至識食》，跟甚麼《回味無窮》、《日日有食神》分別大嗎？換了個主持，改少少包裝就當新節目出街，認真沒用心構思！

今輯《蘇GOOD》明顯無乜回響，其實很合理，上輯大家有期望，全因為是阿蘇初次現身TVB所致。現在發現節目內容型式跟《真人蘇》沒分別，又不見得有甚麼新鮮感，加上已有其他食評家評論阿蘇的presentation是哇眾取寵，人氣滑下自然有理。

不是一味罵人才得的。

我本人其實對蘇施黃作為飲食節目主持，當初是欣賞的；但事到如今，恐怕她無以為繼了。

這輯《蘇GOOD》，暫時只看到一個最大的好處：就是沒有那位自以為好好笑卻無聊透頂到極點的泰山在插科打渾！但這還不足以叫我收看這節目！